Toshkent hayvonot bogʻi

Tarixi

Hayvonot bogʻi 1924-yilda Oʻrta Osiyo universiteti biolog olimlari tashabbusi bilan Turkiston general-gubernatorining shahar chekkasidagi sobiq dala hovlisida, u yerdagi kichik hayvonxona negizida tashkil etilgan; dastlab u 3 gektarga yaqin joyni egallagan. 1940-yillar oxirida bu yerda 200 dan ortiq turdagi hayvon va qushlar boʻlgan.

1994-yilda hukumat qarori bilan Botanika bogʻi hududining bir qismida landshaft tipidagi qoʻralar bilan yangi hayvonot bogʻi qurila boshlangan va 1997-yil 1-sentabrda hayvonot bogʻi shu yerga koʻchib oʻtgan. 1998-yildan u Yevropa-Osiyo zooparklar va akvariumlar mintaqaviy uyushmasi (YeARAZA) aʼzosi.

Bugun

Yangi hayvonot bogʻi 22,7 gektar maydonni egallaydi va unda 3000 dan ortiq jonivor saqlanadi; turlar soni manbalarda 349 (2004) dan 600 gacha koʻrsatiladi. Akvarium boʻlimida dengiz suvi tizimi yaratilgan, unda akula va boshqa dengiz baliqlari bor. Hayvonot bogʻi yirtqich qushlar — qoraqush, kalxat, boltayutar va boshqalarni koʻpaytirishga ixtisoslashgan, noyob turlarni koʻpaytirish boʻyicha ilmiy ishlar olib boradi.

2004-yilgi maʼlumotga koʻra, jamlanmada sut emizuvchilarning 58, qushlarning 74, sudralib yuruvchi va suvda hamda quruqlikda yashovchilarning 26, baliqlarning 191 turi boʻlgan. Hayvonot bogʻi xorijdagi oʻnlab muassasalar bilan hayvon va ilmiy maʼlumot almashadi, Ashxobod, Termiz, Dushanbe va Olmaota hayvonot bogʻlarining tashkil topishida bevosita qatnashgan.