Isoning Muqaddas Qalbi katolik sobori (kostyol)

Tarixi

Toshkentda katolik ibodatxonasi qurilishi 1912-yilda ruhoniy Iustin Bonaventura Pranaytis tashabbusi bilan, polyak meʼmori Lyudvik Panchakevich loyihasi asosida boshlangan. Dastlab Toshkentda xizmat qilgan katolik askarlar, keyinroq shahar yaqinida saqlangan harbiy asirlar — ular orasida malakali muhandis, haykaltarosh va toshtaroshlar bor edi — qurilishda ishlagan. 1917-yilda Pranaytis vafot etgach, ishlarni ruhoniy Boleslav Rutenis davom ettirgan, ammo inqilobdan keyin mablagʻ yetishmagani uchun qurilish toʻxtagan.

1925–1976-yillarda tugallanmagan binoda turli korxonalar, yotoqxona va ombor joylashgan; shu davrda undagi barcha haykallar oʻgʻirlangan yoki buzilgan. 1976-yilda bino taʼmirlanib, Madaniyat vazirligi balansiga oʻtgan, 1981-yilda meʼmoriy-tarixiy yodgorlik deb eʼlon qilingan.

Qayta tiklanish

1992-yilda bino Toshkentdagi katolik jamoasiga qaytarilgan, 1993-yilda meʼmor Sergey Adamov va muhandis Aleksandr Ponomaryov rahbarligida toʻliq restavratsiya boshlangan. 2000-yil 22-oktabrda qayta tiklangan sobor muqaddaslangan, 2005-yilda u Oʻzbekiston Apostol maʼmuriyatining kafedral soboriga aylangan. Bugun bu yerda yakshanba ibodatlari bir necha tilda, jumladan ingliz, rus va koreys tillarida oʻtkaziladi.

1991–2005-yillarda (2001–2003-yillardagi tanaffus bilan) katolik jamoasini Polshadan kelgan fransiskan ruhoniy Kshishtof Kukulka boshqargan. 2005-yilda Papa Ioann Pavel II Apostol maʼmuriyatining birinchi episkopi etib Yeji Masulevichni tayinlagan.