Afshona — Ibn Sino vatani va muzeyi

Qishloq tarixi

Afshona — Buxorodan shimoli-sharqda joylashgan qadimiy qishloq. X asr tarixchisi Narshaxiy uni katta shahriston va mustahkam qalʼaga ega, bir necha qishloq tobe boʻlgan va haftada bir kun bozor boʻladigan joy deb taʼriflagan. Uning yozishicha, Qutayba ibn Muslim bu yerda jome masjidi qurgan, qishloq yerlari esa madrasa talabalari uchun vaqf qilingan. Yoqut Hamaviy va Samʼoniy asarlarida ham Afshona tilga olinadi.

Ibn Sinoning onasi Sitorabonu afshonalik boʻlgan. Bu yerda 980-yilda Ibn Sino, 985-yilda ukasi Mahmud tugʻilgan. Olim besh yoshigacha Afshonada yashagan, soʻng oila Buxoroga koʻchgan. Afshona nomi soʻgʻdcha «duo tez ijobat boʻladigan muqaddas joy» degan maʼnoni anglatadi, degan talqin ham bor.

Muzey va yodgorlik

Afshonada Abu Ali ibn Sino muzeyi va olim haykali bor. Ibn Sino tavalludining ming yilligi Afshonada tantanali nishonlangan va shu munosabat bilan qishloqda ikki sopol gumbazli, oʻymakor eshik va ustunlar, devoriy bezaklar bilan bezatilgan dam olish maskani qurilgan.

Muzey olimning hayoti va merosiga — jumladan, Yevropada asrlar davomida tibbiyot darsligi boʻlib kelgan «Tib qonunlari»ga bagʻishlangan.