Maqbara · Buvayda tumani

Bibi Buvayda maqbarasi

XV–XVI asrlarga oid sodda va salobatli maqbara: rivoyatga koʻra, Shoh Jalil onasi va rafiqasiga atab qurilgan, Buvayda tumani nomi ham shundan.

TemuriylarXV–XVI asrlar20 daqiqa1 daqiqada oʻqiladi

Tarixi va meʼmorchiligi

Maqbara XV–XVI asrlarga oid boʻlib, taxminlarga koʻra, din arbobi va afsonaviy sarkarda Shoh Jalil oʻz onasi Bibi Huvaydo va rafiqasiga atab qurdirgan; Buvayda tumani nomi ham ana shu Bibi Ubayda (Bibi Buvayda) nomidan kelib chiqqan. Bino ziyoratxona va ikki goʻrxonadan iborat, tarhi toʻgʻri toʻrtburchak (18×8,5 m). Peshtoqning ikki yonida guldastalar ishlangan, ziyoratxona va goʻrxonalar gumbaz bilan yopilgan. Sharq tomonda ziyoratxonaga taqab Bibi Buvaydaning nabirasi qabri ustiga kichik xona qurilgan. Maqbara bezaksiz, ichkarisi ganch bilan suvalgan, eshigiga handasiy naqsh oʻyilgan; qurilishda 25×25×5 sm oʻlchamli pishiq gʻisht ishlatilgan. Yodgorlik «Ipak yoʻllari: Fargʻona–Sirdaryo yoʻlagi» nominatsiyasi tarkibida.