Alisher Navoiy nomidagi Kino saroyi («Panorama»)

Tarixi

Kinoteatr uchun Navoiy koʻchasida 2 gektar yer 1958-yilda ajratilgan, loyiha 1961-yilgi respublika tanlovida gʻolib chiqqan. Bino 1962–1964-yillarda qurilib, 1964-yil noyabrida «Sanʼat saroyi» nomi bilan ochilgan; universal tomosha zali loyihadagidan koʻp — 2300 kishini sigʻdirgan. Bosh meʼmor Sergo Sutyagin, mualliflar jamoasida V. Berezin, Yu. Xaldeyev, D. Shuvayev va O. Legostayeva boʻlgan; interyerlarni Aleksandr va Viktor Ganlar bezagan. Mualliflar 1964-yilda Hamza nomidagi Davlat mukofotiga sazovor boʻlgan.

1976-yilda 600 oʻrinli qoʻshimcha zal qurilgan, 1978-yilda bino shahar tarixiy-madaniy yodgorliklari roʻyxatiga kiritilgan, 1991-yil 20-iyunda unga Alisher Navoiy nomi berilgan. Xalq orasida u «Panorama» kinoteatri deb ataladi.

Meʼmorchiligi

Bino ikki hajmdan iborat: koʻp qirrali silindrsimon kino-konsert zali va vestibyul hamda foyeli ikki qavatli oynavand pavilon. Zal devorlari keramzitbetondan yasalgan yupqa, ammo mustahkam qobiqsimon panellardan terilgan — shu tufayli 1966-yilgi zilzilada boshqa kinoteatrlardan farqli oʻlaroq bino zarar koʻrmagan. Maydoni 476 m², oʻlchami 34×14 metr boʻlgan, 146 gradusli yoy boʻylab egilgan panoramali ekran dunyodagi eng yiriklaridan biri edi.

2026-yil 26-iyulda bino «Toshkent modernistik meʼmorchiligi. Markaziy Osiyoda zamonaviylik va anʼana» seriyali obyekti tarkibida YuNESKO Butunjahon merosi roʻyxatiga kiritildi.