Amir Toʻra madrasasi

Tarixi

Madrasa Ichan Qalʼaning shimoliy qismida, Bogʻcha darvoza yaqinida, Hasanmurod qushbegi masjidi roʻparasida joylashgan. Uni Muhammad Rahimxon II ning ukasi Amir Toʻra qurdirgan; manbalarda qurilish sanasi 1870 yoki 1872-yil deb koʻrsatiladi. Aytishlaricha, qurilish Muhammad Rahimxon madrasasi bilan bir vaqtga toʻgʻri kelgani uchun gʻisht va mohir ustalar yetishmagan, Amir Toʻra Toʻrtkoʻl va Shoʻraxon ustalarini jalb qilgan. Madrasaning ichki tomoni koshin bilan qoplangan, tashqi tarzi esa bezaksiz qolgan — buning sabablaridan biri 1873-yilgi Rossiya yurishi deb hisoblanadi. 2017–2019-yillarda madrasa ikki bosqichda taʼmirlanib, Xiva restavratsiya maktabiga berildi: bu yerda ustalar tayyorlanadi va sayyohlar taʼmir ishlarini oʻz koʻzi bilan koʻrishi mumkin.